الحلــم أصبـح حقيقــة
السهر معروف انه مضر للإنسان، بس بالنسبالي السهر احلى وقت ليا وخصوصًا قرب الفجر،لما بكون سهرانه وبفكر في يومي اللي هيبدأ،
كنت سهرانه الساعة `04:09am` بالضبط فجأه لقيت النور بدأ يضعف، اول مره تحصل،مدتش للموضوع اهمية بصراحة، بس الحركة دي اتكررت اكتر من مرة، وفجأة سمعت صوت جاي من الكورنر اللي جنب دولاب الاوضة بتاعتي، مركزش اوي، بس الصوت اتكرر تاني مع نفس ضعف النور، ده إللي خلاني اركز، لحد ما لمحت كيان شخص واقف هناك، وبيضحك، معرفتش اتحرك من مكاني، جسمي اتشل عن الحركة مرة واحدة، بقيت شبه العروسة اللعبة لما تخرج من العلبة بتاعتها..
فجأه لقيت الكيان ده اختفى، والصوت اختفى، و النور رجع لطبيعته عادي،
بس فجأة لقيت نفسي في أوضة غير اوضتي، شكلها غريب و مريب في نفس الوقت،
حاولت اخرج بس مش لاقيه باب اخرج منه...
فجأه ظهر من العدم، نفس الكيان اللي شفته في الأوضة، بدأ يوضح، وشفت شكله، كان شكله بشع اوي، لا يوجد وصف يوصفه حرفيًا،
فجأه لقيت نفسي واقفه قدام الكيان ده، بس مكنتش انا، كأن روحي هي اللي قدامه ....
الكيان ده كان معاه حاجه شبه الخنجر، قرب مني(نفسي مش انا) وطعني بالخنجر ده في قلبي، من بشاعة المنظر انا صوت، فجأة الكيان انتبه لصوتي وبصلي جامد اوي وقرب مني وانا برجع لورا من خوفي منه كان شكله مرعب اوي فجأة لقيته قدامي مباشرةً وبدون إنذار للجاي وبنفس الخنجر، طعني في قلبي...
فجأه صحيت!
أيه ده ازاي؟
لقيت نفسي في الأوضة بتاعتي، نايمة وكويسة مفيش اي حاجة، وانا بهدي نفسي ؛لقيت رساله اتبعتتلي من رقم مجهول:
"استعدي عشان الحلم هيبقى حقيقة،في دقيقة"
استغربت الرسالة،مين اصلًا هيبعتلي رسالة دي دي..!؟
بصيت للساعة لقيتها04:09am..
اترعبت،
طب ازاي...!؟
أنا كنت سهرانه عادي ايه اللي حصل..!؟
مين الرقم ده!
وايه الكيان اللي ظهر ده...!؟
قطع تفكيري ضعف النور مره تاني و نفس صوت الضحك بس بصوت أعلى، والمره دي ظهر الشخص البشع ده قدامي مش الكيان،
وفجأه النور قطع، وصوت ظهر قريب مني،
"الدقيقة خلصت، وجه دورك..."
گ/مــریمـ گریمـ | بُـــومــةُ الْلَــيْـلُ ♡゙.
